Konm moin la di azot : dabor Didier épi son fine ékip la mète Tampon a sèk épi li la parti La Réjyon konm mi di azot té a flo – konm i di lété lo trézor Paul Vergès-mé dizon l’annui la énète in zour par l’iniformité é oila ké Didier épi la fine ékip la kalkil in n’ot landroi pou alé.

Pou kosa d’apré zot ? Pars lé vré l’androi lé bon, mé moinzanmoins pars néna in bann jigilèr dan la Réjyon-la épi tout a l’antour. In bann rodèr lo pou dann la tète la poin shové é an pliské sa, la maréshosé lé touzour apré louké, fouiné, rodé, shèrch in manyèr pou poz la min dsi ou ? Konbien foi sa l’arivé dopi 2010 ? Pa arien k’in kou siouplé : x foi pou NRL, x foi pou bann mashé, x foi pars i prétan lo prézidan la ankèss larzan la pa li, épi oila zordi sète afèr lo bann bon la kontinuité.
Akoz lo moun néna la kol dsi l’doi konmsa ? I fo kroir sa la pal o privilèz lé shèfsa koméla.

L’èrla, mésyé Didier la kalkil pran la méri Sin-dni : lo pli gran komine l’outre-mèr avèk in bidzé konsékan so kou isi ankor. Avèk in kantité projé pou monté démonté, fé épi rofé. Sanm pou li la komine Sin-Dni sé lo prolonzman natirèl la Réjyon Rényon. Zistoman i tonm konm i fo pars la Réjyon i sava aroz dé gran zournal-plis in milyon shakinn - épi in blog bien koni-160000 euros pou li san konté in pré san lintéré
An touléka si mi tronp pa, ala vréman in moiyin pou prépar zéléksyon é pou an avoir lo bann shans gagné. Avèk sa, konm diré Didier, épi son fine ékip, li sava anvoye lé zot dingé. Foi d’ Didier ! Koshon ki se dédie.
Nb Rastignac té di pa : « A nout dé toué Paris ! »