Normalman rante in malade épi son médsin sé konmsa ké lé shoze i éspass, tèl fasson k’i soign pa solman bande konsékans la maladi mé la maladi èl mèm – dé foi i apèl sa in trètman d’fon.

Astèr majine in péi oussa lé shoze i marsh pa konm k’i fo, totalman sansa par plass. Alon majine La Rényon : normalman ni koné toute sak i marsh épi toute sak i marsh pa, sansa a domi, donk ni koné – antouléka ni pé konète – bande voiyan sak lé o vèr, sak lé jone oranz épi sak lé o rouj, mèm sak l’apré klignoté pou shanj koulèr. Pou kossa ni koné sa ? Pars ané pou ané, moi pou moi, somenn pou somenn é zour pou zour néna in bande linstiti i oskilt noute péi épi i fini par di kossa i va, kossa i va pa, kossa i dékline, é kossa k’i va myé, é tazantan i trouv lo médikaman k’i fo pou guéri déssèrtènn maladi ké noute péi néna.

Défoi i fé in sinp konsta é i aporte pa okin solission. Lé konmsa é ni koné k’lé konmsa !

Souvan défoi léspèrtiz lé fé par déssèrtin parti épi galman par déssèrtin zassosiassion, déssèrtènn pèrsone i travaye la dsi san arété. Parti kominis dopi li égzis – 1959 – mèm avan kan li lété fédérasion lo PCF i arète pa étidyé lo maladi noute péi épi propoze lo bande solission k’i fo, d’apré li, pou tire lo péi dann malpassé… Zot i doi domandé pou kossa in parti san moiyin, san gran éspéssyalis la fé épi rofé lo dianostik la santé noute péi. Mi pans sèryèzman pars li néna in lavantaz dsi bande mouvman épi parti la ké sak néna dan La frans – li lé otonome donk li néna in réfléksyon otonome par raporte lo troi létape nou la marke an-o la.

Astèr lé pa étonan ké konm Gilbert Annette la di kan lété soisantyèm anivèrsèr noute parti si lo PCR téi pèrsoi droi d’otèr dsi son bande zidé épi son bande projé li noré té a kou sir lo pli rish rante toute lo bande parti néna issi La Rényon… Souvan dé foi pou sak lé in pé avizé li pé konète an parmi bande pèrsonèl politik épi sindikal kissa la pass par parti kominis épi sak la pa passé. Sak la passé normalman li konfonde pa lo troi zétape nou la marke an-o la : li koné kossa i lé la koze épi la konsékans, lo fon dé shoze avèk la sirfass, lo la mèr avèk lékime.

A bon ékoutèr, salu !

Justin