Poitan mwin néna konm linpréssion nout zénèss i koné pli d’zafèr dsi lérop ké dsi loséan indien malgré litililité ké noré pou nout tout a konète pliss dé shoz dsi loséan indien. In pé va dir sé pars nou lé insilèr, mé insilèr i vé pa dir ni gingn pa konète é ni gingn pa aprann.

Poitan ni koné bien si néna kékshoz pou sov anou dann lavnir sé la matyèr griz nout popilassion pars sa néna in grann valèr é pars la zénèss néna léspri drolman ouvèr é paré pou akèye la konéssans.

Kontrèrman par rapor tout marshandiz la konéssanss sé sak i ogmante dann la kominikassion é sé sak lé pli fassil pou ramassé, pou klassé, pou an sèrvir… Mé wala, mwin néna konm linpréssion lékol i zoué pa forsséman lo bon rol li pouré zoué.

Néna inn-dé zour dann laktyalité téi parl l’homo sapiens é konm té in n’afèr dann laktyalité nou la antann dann bann radio demoune apré anparlé pou done rézon inn, tor l’ote san dévlop vréman in kozé-vérité, san amene dann lo déba dé shoz pou anrishir la konéssanss lo bann sobatkozèr.

Alor sirésèrtin i fo ni rofléshi… In zour mwin la antann in n’afèr, mi koné pa si lé vré. In zoinaliss té apré dir : tik-tok néna dé manyèr. Inn pou bann shinoi pou zot aprann in ta zafèr, é inn pou bann zéropéin pou rann azot pli bète.. Si lé vré, kossa i anpèsh anou dévlop in tik-tok la konéssanss konmsa nout zénèss èl ossi èl i vien pli intélizan é ni lèss pa abétir anou. Si lé vré mé lé pa prouvé pou mwin.

Alor lé sirésèrtin i fo la zénèss néna légalité dsi la késtyonn la konéssans mé sa i fo organizé intélizaman… Hmmm ! Intélizaman sa in késtyon inportan sa ! Mé i paré dann tan lontan in prézidan d’konsèye téi apèl Clémenceau la di, la guèr sé kékshoz tro inportan pou konfyé sa bann militèr. Mi koné pa si lé vré mé lé dikassion sré pa tro inportan pou konfyé sa lédikassion nassional ? Késtyonn ri in pé.

A bon antandèr salu !

Justin