Mi koné pa si zot i koné pti liv-la : sa in pti liv, Axel Gauvin la ékri pou ède soubate kont lo rasism. Si mi tronp pa, sa i apèl : "Abder Zanfan komor."…Sa zistoir in marmay komor i vyin lékol La Rényon épi inn-dé marmay i sousyé solman pou an-nuir ali, i di ali konmsa pou kossa li la vni issi, si sé akoz banane avèk manyok na pi dann son péi. Abder lé maléré, pars li domann ali kossa li la vni fé dann in landroi demoun i ème pa li, i ème pa son nassyon. Solman in zour, in marmay rényoné i tonm malade, i gingn in maladi grav, i fo inn grèf la moal pou guéri... Byinsir, toute marmay lé volontèr pou ède sak lé malade mé la moal la plipar lé pa konpatib, sof la moal banna la tir avèk Abder é sé li k’va sov son dalon l’ékol.
Pou kossa mi rakonte zistoir-la ? Pars lé zoli mé pa solman. Pars mi sort antann dann télé, in bann paran la pa vouli z’ot zanfan i shanj séktèr épi i sava dann in l’ékol nana in bon pé maoré, in bon pé komoryin. Moin lé pa sir sé sa, mé si sé sa, alors nout sosyété lé byin malade, èl i mérite in bon trètman. Dir k’tou l’moun i di, tou l’moun i pans, nana lontan nou lé fine guéri so maladi k’i apèl rasism ! Dir k’nou nana la prétansyon ansèrv modèl pou lé z’ot ! Mé fransh vérité, sa i kontinyé mine anou konm défé dann la si-ur do boi : li marsh, li marsh, i ranp an-dsou, ép d’in kou, li flanm. Li lé riskab fou d’fé partou..
Mi éspèr solman, si lé vré, bann mètr l’ékol i mank ar pa fé in bon léssonn moral. La pa sèlman lo bann mètr so lékol-la, mé dann toute l’ékol. Kansréti d’fé lir bann marmay lo pti liv Axel la ékri pou l’Unesco, si mi tronp pa, lo pti liv i apèl konmsa "Abder, Zanfan komor".

Justin

Lésplikassyon inn-dé pti mo :

soubate : sobate, vanzé
son dalon l’ékol : son kamarade l’ékol ;
miné : pou d’fé kan i ouv sou la sann ;
ansèrv modèl : donn lésson demoun
kansréti : o moins ;