Sé konmsa ké so matin mwin la rouvèr in nouvèl foi in pti liv lo parti la pibliye néna inn-dé-troizan avèk konm tit : abolir la povrété avan 2030. La pa pou malparlé mé dapré mwin néna arienk nout parti i fé bann piblikassion téorik konmsa so kou issi sé dann la sélébrassion la loi 1946 dsi la départmantalizassion… Arzoute èk sa sa lé an rolassion avèk bann prozé internassional pou élimine la mizèr dann lo mond.

Biensir mi sava pa fé lo rézimé lo pti liv. Biensir mi sava pa non pli anparl bann démonstrassion téorik, mé mi di sa sinploman pou amontr issi La Rényon néna d’moune lé trakassé par la sityassion nout péi, é néna la volonté propoz bann solission pou trouv pou in problèm lé grav pou nou pars néna pliss karant pour san dmoune i viv dann la povrété, pars néna a popré diss-sète pour san dmoune i viv dann la mizèr, dann in moiyin péi konm La franss i fé parti bann péi rish dsi la tèr(sizyèm ékonomi mondyal).

Mi rapèl sa pars zordi i parl solman lo bann difikilté lo finanss franssèz é mèm lé késtyon ékonomiz karant — kate milyar léro pou lo fitir bidzé l’ané 2026, donk la késtyonn povrété épi la mizèr dann bann péi loutremèr i aparé pa pou bann gouvèrnman konm in problèm prinssipal pou réglé mé konm in n’afèr romi dann kalande grèk-in késtyon sibaltèrn.

Alor si zordi mi anparl sa sé pars La Rényon la pankor réissi son dévlopman é ké san sa nora pwin in bon dévlopman pou lo péi, donk in dévlopman bann rishèss avèk lo moiyin pou done kréol travaye é sa sé pou nou in késtyon fondamantal l’èr nou lé dann la vi komine avèk in péi rish dopi la loi 1946 donk dopi talèr 79 zané.

Alor, késtyon ? Kossa i atann pou élimine la povrété dann bann péi loutremèr épi issi La Rényon ?

Sar pou 2030 sansa pou la Sin Glinglin ? i fo atann ankor kan kok nora lo dan ? A bon antandèr salu !

Justin