Lavé in boug té i apèl Achile. Étan pti, li la tonm dann san dragon, solman kan lo san té apré sèk, nana in fèy la tonm sï son shoviy. Donkalor, zis landroi-là, son kor té pi anvlopé avèk lo san-là. Son lanvlop té i ran ali invinsib partou, sof koté son shoviy. In zour, dann in guèr, li la gingn in flèsh dann lo sèl landroi lit é pa garanti, la kaokine ali.

Vandrodi pasé, navé in féklèr sï lanségnman la lang épi, momandoné, na in moun la di : « in bon métod pou aprann fransé, sé l’immèrsion » : tranp marmay dann fransé ziskatan li pratik so lang-là konm in bon fransé d’Frans. Mon pti pé d’san la boui : aprann fransé dakor, mé pa ziska pèrd nout lidantité rénioné, nout lang rénioné. Lo bilinguism, la pa sa ditou, sé konèt manyé inn avèk l’ot ; dé koté, ou lé bon toulbon.

Nana lontan bann gran shèf blan l’apré sèy tié nout kréol, solman zot la pa niabou. Si i fé in nafèr konm la di anlèr-là, in “l’immèrsion”, mi pé dir d’avans, sa va foiré. Akoz ? akoz nou la éné dann bin kréol rénioné, nou la pa rienk tonm dedan, nou la kontinié bingn dédan.
É pi, mi pé asir azot, la poin fèy la tonm sï nou kan nou la sort dann bin-là. Achile sé in gouyav koté nou !

Justin