Mi souvien, lo soir la véyé Laurence Vergès, na in moun té la. Pa in militan Parti kominis, mé in ga koni dan bann z’asosiasion. Li té apré ésplik pou kosa li té la, é li té i di konm sa, té pars li apersoi nana gran militan dan lo péi é li té i koné pa. Moin pèrsonèl mi frékant bann militan, é afors frékant azot, mi fini par pi pansé kosa zot la fé dan zot vi é koman zot la sakrifié zot vi pèrsonèl pou zot parti, pou lo pèp rénioné, pars dan zot l’idé, sa i fé pa dé, mé sa i fé inn.

La vi la vouli ké ni pèrd plizièr militan inn apré l’ot. Moin la pèr di lo bann nom pars moin la pèr oblié, mé moin la fine di lo nom Laurence, avan l’avé madam Valiamé, épi kamarad Marat la parti, épi l’ot zour la kamarad Toplan, épi Bélon, épi ankor Nadège Bénard. Zordi, sé Roger Hoarau k’i sava. Si mi di azot, rant militan, nou lé konm an famiy, pétèt zot va trouv mi fé tro. Poitan lé konm sa : in militan Parti kominis, sa la pa nout famiy pou vréman, mé lé konm si. Nout kèr i sègn kan zot i sava. Pou kosa ? Pétèt pars nou la partaj lo mèm soufrans, lo mèm kontantman dé foi, défoi lo mèm dézéspoir. Na in gatir rant nou, in gatir lo tan i démar pa. Na tèlman la solidarité rantr nou !

Na dé troi z’ané, in n’ot militant lé désédé, é mi rapèl, dann jardin la katédral Sin-Dni, l’avé in kantité d’moun tasé inn avèk l’ot : bann dirijan nout parti, bann militan osi, épi bann moun la jamé kash zot sinpati pou la koz nout pèp. Koté moin l’avé in ga, mititan la droit dépi touzour. Son zié té i klat dsi bann militan groupé épi li di amoin : « Sa sé in vré solidarité ! ». Sak i gatir anou lé z’inn avèk lé z’ot, sak i fé ké k’nout parti i tienbo d’bout.

Adié mon bann kamarad, in zour, mi koné, mon tour v’arivé. Zour-la, kèr klèr moin osi m’alé, konfian si moin lé sir moin la done sak mi pé, pou mon péi, pou mon pèp rénioné é pou mon parti, konm moin la di, la poin la diférans la-dan.

 Justin