Ousa li té sorte ? Kouk li té fé son zourné ? Domoune té poze pa zot tro la kèstiyion.
Pou zot, sat lété sir, osi sir dann mon min nana sink doi, sèk sak noute Marcel lété la, biyin droite, osi droite kin boug i pé èt droite. Dèk solèy té koup an zigzag pou kas’ in karang, lo zoli limièr son bouiboui té angaz in konba korakor èk fénoir.
“Chez Marcel”, té rèt alimé toute la nuite. In kré la fin ? In kré lamitiyé ? In lanvi kozé ? Kari volay, rougay sosis, lo rom Marcel té fé lo tour lo mond. La poin in bébéte la nuite la pa poz in zour son dé zèl si kontoir Marcel.
Bébéte la nuite ? Pa toute kalité bébéte la nuite. Pou rant “chez Marcel” i falé èt korèk. Si ou déréspèk pa li, si ou déréspèk pa son bann klian, alors’ Marcel té akèy aou gran kèr.
Li lété komsa Marcel, in boug dir syé gran kèr. Dir konm son vi lété dir : batay dann shan kane lo Gol kont fourmi pikèr lo san ou, sinonsa, dann la boulanz Saint-Denis fé d’pin pou mèm pa un boushé manzé. Mé in kèr gran konm la vi : la vi sat lé démini, la vi son koiylou, la vi an partaz.
Marcel la tènn définitivman son fanal mé son limiyièr va éklèr anou ankor lontan. Anou Réniyoné.

Justin