Shak jour lé posib dékouvèr in moun bien, in moun la sakrifié ali pou la défans son z’idé, pou la défans inn sansa plizièr idéal. Sa lé vré pou Adrien Minienpoullé, in ga i sort kit anou mèrkrodi pou alé dann péi la mor. Adrien té in militan Parti kominis rénioné, Adrien té osi in moun inportan pou son rolijion, son filozofi, mé té pa in moun la sèy fé fortine : moin la zamé antann dir li la anrishi ali épi li la mépriz bann moun té i viv dann kan.

Biensir, mi vé pa rakont sa vi. Biensir, mi vé pa ékri l’istoir Adrien Mienpoullé. Mi vé solman rakont in souvnir dann tan la klandéstinité Paul Vergès. Mi rapèl bien, l’avé fé in gran rankont bann z’intéléktièl, la-o dan La Plène dé Kaf : in l’okazion pou nout mémoir travay pou ésèy mèt anlèr nout kiltir. Toulmoun té pa dakor san pour san, mé toulmoun té i ésèy mèt in pé anlèr la kiltir nout péi. Dann zourné-la, la pa parl la rolijion indou é la sivilizasion tamoul, mé mi souvien bien, na dé foi té i parl de sa.

Kan lo soir la tonbé, kan solèy la lav son pié, mi rapèl nou la désann dsi La Plène Palmist dann in pti voitir 204. Kisa l’avé la-dan : Navé Adrien, moin té la épi l’avé kamarad Paul Vergès, an stan-la dan la klandéstinité. Mi souvien osi n’avé d’ot pèrsone. Shé kisa l’ékipaj-la té i sava ? Té i sava shé in moun dann tan-la l’avé son z’antré la préféktir. Li té i atann pa oir Paul, mé kan li la vi, li la di sinploman, na in pé i di ali Paul la fine kol shomin pou alé dan d’ot péi. Moin la konpran lo tik-tak, é lo bi la manèv. So nui-la, moin la antann rakont in bonpé la koripsion nout péi lété d’dan. Pou son par, Paul la di anou, domin tout in bann demoun va konèt moin té La Plène Palmis yèr soir.

Dann gro fénoir nou la parti é Adrien la profit pou domann Paul Vergès ransègnman dsi lo kolonialism, dsi la plu-valu, é dsi d’ot poin téorik ankor. Nou, bann jèn, nou té i ékout sa èk pasion. Nou trajé l’amèn anou Sin-André, épi l’ékip la kas par bout, é moin l’ariv mon kaz tar dan la nuit... Pou kosa mi anparl de sa ? Pars nou la travèrs difikilté in pé partou, é shak foi, nou té i obli pa pans l’avnir nout péi, é majine koman ni fabrik nout demin. Lé inportan sa ! Adrien, in moun inportan pou nout péi. In ga nana la mémoir pou pasé.

 Justin