An parlan, ala in patoi moin té i ansèrv étan marmaye. Sa la pa in provèrb biensir é li aport pa arien dsi la kalité d’vi an sosyété. Tout fason, dann tout z’afèr nou la pa bézoin alé rode l’itilité sof si fé ri la boush sé in n’afèr itil-tout fason i vo myé ri ké pléré, i vo myé fé ri ké fé pléré. Mi mazine zot i pans konm moin ? Zot i koné, nou kréol rényoné nou sé in bann kasèr lé kui. Tourn an bourik ? Sa sé in n’afèr ni yèm. Kass tiboi ? Sa ni yèm galman. Shanj po d’shanm an pla kouvèr ? Sa sé nout afèr. Kisa la di : « la di la fé sé » nout éspor nasyonal ? Mi pans zot la poin rézon ; kass lé kui, ala nout éspor nsyonal. Alé ! Mi kite azot rofléshi la dsi é ni artrouv pli d’van. Sipétadyé !