Marmaye koméla na pi tèlman lokazyon pou mézir z’ot fors épi z’ot kapasité. Ni pé di sé pars, zot lé koupé par raport la natir. Lontan l’avé touzour in galé pou anvoye dsi zoizo, in mang pou fé tonbé, in pyé d’boi pou grinp dosi ziska lo pti pointe l’apré fléshé. Koméla, sirtou isi shé nou marmaye i gingn pi fou in kou d’galé konm k’i fo, grinp dsi in pyé d’boi, fé roul in toupi sansa fé d’ot shoz ankor. Mèm bann zoué lé éléktronik antomatik ! Sé dir si in marmaye nana l’okazyon vréman pou mézir avèk in n’ot dann bann zé nou téi fé lontan étan marmaye. Kaminmsa, l’adrèss i égzis touzour é dann la vi in moun i pé ète adroit konm pa. Kan i di li lé adroit konm Zozèf a gosh, sa i vé dir li lé vréman maladroit. Pou z’ot par, zot lé adroit sansa zot lé konm Zozèf a gosh ? Mi lèss azot rofléshi la dsi é ni artrouv pli d’van sipétadyé.