Oté

Afèr a suiv konm i di ! Afèr danzéré a tou lé kou ! Danzé piblik !

Justin / 1 octob 2018

JPEG - 43.6 ko

Chlordécone-i di osi clordécone : Kosa i lé sa ? Sa in produi la mète an kantité dann bann plantasyon banane dann bann Zantiye pou lite kont lo sharanson bann karo banane. In produi shimik i apèl galman bann pèrtirbatèr andokrinien. Antansyon si ou i dépass la doz marké. Antansyon galman si néna in gro konsantrasyon dann la tèr, dann lo, épi dann kor demoun.

I parétré la ansèrv sa ziska l’an 2000 par-la... Pou l’administrasyon la pa danzéré si i réspèk la doz. Pou bann sèrvis l’éta la fé l’ankète na poinn danzé. An kontrèr sa sé arienk bénéfis pou bann plantèr épi pou la popilasyon an zénéral. Mé oila ! Momandoné la komans parl pou bann zantiyé in poursantaz kansèr la prostate pa normal ditou-bokou pli for ké dann in bonpé péi parèye. Momandoné lo l’administrasyon la komans di bann demoun i égzazèr drolman. Tan ka bann lansèr d’alèrt, zot lé la boudikont arienk la pou anpèsh lé shoz déroul normalman-bann anpèshèr pou léshoz roul ron.

Solman oila, in pé apré l’ané 2000 dann bann plantasyon banane l’arète avèk produi-la. Ouf ! Zot va dir amoin. Bin non zistoman pars a s’ki paré la doz dann la tèr la doz dann lo, la doz dann bann tisu imin lé si tèlman for demoun lé fouti ansanm pou plizyèr santène z’ané. Zordi, bann médsin l’apré d’mandé si produi-la i sava pa artard la kroisans bann zanfan.

Si tèlman bann roprézantan l’éta la komans par inkyète in kou. Mésyé Macron paré-t-il li lété dann bann zantiy pou dé troi zour somenn dèrnyèr, i paré li té i doi déklar sa konm éskandal d’éta. Moin la pankor tandi sa ozis, mé sé in n’afèr fé son shomin. Konm lo bann konsékans léspérimantasyon atomik laba dann la polinézi l’apré fé son shomin. Konm déga lo glyphosate l’apré fé in pé partou konm isi La Rényon.

Afèr a suiv konm i di ! Mé afèr danzéré sa lé sir ! Danzé piblik !