Afèr pou suiv konm i di : kansa vré zintèrprète kréol-fransé, fransé-kréol dann tribinal ?

Mézami néna in paké d’zané désèrtin dann nout parti l’avé anparl mète bann zintèrprète dann tribinal pars demoun té i suiv bann prosé zyé rouvèr é pa zyé fèrmé, té i romark, souvan dé foi bann kréol rényoné téi fé kondane azot inn par zot téi konpran pa kozman lo prézidan tribinal-konm zot téi konpran pa bann ékéstyon bann zankétèr, zandarm sansa polis. Dézyèmman pars zot té i fé in léfor pou réponn dann in spèss fransé mal fagoté. Rézilta, konstatasyon.

Biensir la zistis la zamé fé in ka sanm sa. Touzis si tazantan inn dé prézidan téi fé konmsi zot téi konpran é tout fason konm zot min té lour zot téi tap for é pèrsone téi protèst pa : lo kondané ou bann kondané té in bann pov kréol La Rényon tout fason zot prosé lété fé d’avans… Pou fèr bien, désèrtin zistisyab té i san azot oblizé mète zot kréol par kote, épi larg zot fransé avèk difikilté.

Pou kosa mi anparl de sa ? Pars firamézir demoun i komans koz kréol dann tribinal é lèss tonb zot fransé makote, dizon zot fransé boulon konm moin la déza antann dir. Kosa nou la antann somenn isi ? Nou la antann dé zavoka parizien, la vni isi pou in prosé la okip laktyalité apré di dann mikro zot i sava domann kassasion. Pou kosa ? Pars in moun-in l’akizé - téi koz toultan kréol é zot téi konpran pa donk zot i pans zot kliyan a zot lété pa défandi konm k’i fo é lo prinsip légalité toulmoun dovan la zistis té pa réspékté.

Nou va oir kosa la kour kassasyon va désidé mé antouléka ala in vré késtyon i komans pozé sèryèzman. A suiv, konm i di !