Mézami, mwin lé ankor kontan par raporte bande zéléktèr la mète lo Didier Robert in sèryé koud’rèss trankil dimansh dann zéléksyon réjyonal. Mé la pa pou sa ké toute lé klèr san pour san.

Dabor inn, koman konète la vérité si ou néna afère avèk in moune i manti konm in rashèr d’dan. Ziska dèrnyé zour son pouvoir mwin lé sir li va kontinyé manti. Pou la bone rézon ké pou li lintéré zénéral sé arienk son prope zintéré. Alor si wi koze pa lo mèm langaz ké li, sar dire pou ou démaye sak lé vré épi sak lé fo.

Dézyèm zafèr pou sak i koné pa li, armajine solman dann kèl léta li la lèss lo finanss la komine Tampon. Alor zot i pé konte dsi li é lo bande filou k’i antoure ali pou arfé lo mèm zafère avèk finanss La Réjyon-an pli grave pars promyé kou lété bande tampon la sibi lo konsékanss é so foi issi sé toute La Rényon.

Troizyème zafèr mwin la bien père ké kan va fé lo bilan-léta dé lyeu si zot i vé – néna pliss déga ké ni kroi, anfin tardra viendra nout toute va fini par konète kossa méssyé Didier i la lèss an partan…

Oui, zistoman, kissa i sava répare bande po kassé é dsi la boss kissa ? Arzoute in pé toute sak la pa fé ziska zordi, koman i pé fé sa, avèk kèl larzan, é suivan kèl plan. Mwin pèrsonèl, mi voudré pa ké sé mon bande zanfan é mon bande tizanfank’i sar pèye la faktire pars mi préssan nora pou péyé. Ala pou kossa, mwin in sinp sitoiyin mi trakass amwin pou léta lo finanss La Réjyon. Zot i pé dire la pa bézoin trakassé pou sa vi k’néna in lékipe an plass é li na ka okiperépare bande po kassé.

Bon, afère a suiv konm i di é anpliss a suiv do pré.