Mi pans sa in kozman zot tout i koné. An touléka, bann pratikan – zamouré nout lang i koné bien. Mé mi koné pa si zot la konète lo tan téi ansèrv kalbass pou pran d’lo pars figir azot la pa toulmoun l’avé rozoir sansa fèr-blan, parl pi lo kourant lété rar konm korn lapin… si tèlman kan volèr téi rant dann out kour si l’avé in fèr blan zot téi sava avèk. Konm la kok in kalbass té pa tro solid, momandoné téi kass. Sans figiré i vé dir afors ansèrv in n’afèr, sirtou san pran prékosyon, afors iz ali konm i di ziska la kord, momandoné li sède. Sa i pé z’ète in l’obzé, sa i pé z’ète galman in rolasyon d’amityé sansa d’ot kalité rolastyon. Moin lé sir si zot i fé travaye z’ot koko, zot va trouv in bon ka pou aplik kozman-la é ni artrouv pli d’van. Sipétadyé !