Mi sort lir in drol nouvèl. Biensir bann gran télé i koz pa la-dsi. Akoz ? Pétète zot i pran sa pou in n’afèr normal, kaziman natirèl. Pétète zot i pans la pa bézoin bann ti-kolon i koné sa. Poitan, sé in n’afèr a savoir ; di amoin kisa ou i frékant, m’a dir aou kisa ou i lé !
Donk, ala l’afèr ! Lo pti prézidan la rosovoir bann moun lo promyé ron. La pa in ron batay kok ! La pa in ron moring ! Mé in ron larzan, rézèrvé pou sak nana in bon moné, épi la pran l’abitid done sa l’UMP, lo parti lo prézidan par li-mèm. Dovan banna, li la fé in gran diskour pou dir kossa li sar fé ziska l’ané 2012, li la anparl fiziy l’ISF (impôt sur la fortune) k’i ansèrv pou pèy lo RMI, é moin lé pliské sir bann gro vaza la tonm d’akor sanm li. La sirman parl ossi la réform fiskal ! Sa i vé dir koman roul bann klas moiyène dan la farine an fézan kroir azot i sava rann zinpo in pé pli zist. Lo tik-tak i fé dépi in bon koup de tan.
Pou sak la fine oubliyé, lo prézidan la parti lo soir li la gingn la viktoir fé la fète avèk bann rish dann in boite i apèl le Fouquets. Mi koné pa ousa sa i lé, zot non pli, pars la-ba la pa l’androi i trouv bann ti-kolon. La-ba mèm li la fé son promès bann rish é nou la vi li tyinbo son promès li fé avèk banna, pa sak li fé avèk nou. Nou va oir la suite... mé nana déza in provèrb kréol i done la suite-la. Provèrb-la i di konmsa : « Afors alé a l’o, kalbas i kass ! ».*

NB : In kozman i paré lé valab pa arienk La Rényon, mé ossi dan la France, mèm dan la Tinizi.

 Justin