Moin la pankor antandi in sèl moun La Rénion pou dir la vi lé pa shèr. In pé i mète lotèr déssi leuro, d’ot i di konmsa na tro la taks déssi bann marshandiz, d’ot ankor i di tout zafèr la anshéri déssi marshé mondial... in pé i di konmsa sé bann nouvo produi konm téléfone portab sansa la télévizion par satélite k’i ruine nout pouvoir d’ashté. In bonpé i mète la fote déssi bann éspékilatèr.

Konm dabitid, nana in bonpé rézon, mé sak lé pir, sé k’na poin in bon lésplikasion, na poin la transparans dan bann pri... Kant a bann salèr, bann retrèt, lalokasion shomaz... sa i goumant pa, sansa in pti myèt solman, késtionn boush in pé nout zié !

Poitan, la fé in lobsèrvatoir pou sa. Mé i donn pa li le moiyin pou fèr son travay. Dizon i tourn banna an bourik épi zot i pèrd zot tan initilman... mèm ziska invant in “panié la ménajèr” ! Mi koné pa kossa i ansèrv azot, mé moin pèrsonèl, mi konpran pa kossa sa i ansèrv, mi oi pa son litilité... ditou, ditou, ditou !

Solman lo tan i pass. Demoun lé plizanpli an difikilté. Mèm zot lé plizanpli an kolèr. Tansion pangar ! La guèr la pété la-ba dan la Guyane ! É issi, ziskakan demoun va pran pasians ? Konm di le kont : afors alé a lo, kalbas i kass !

Justin