Gouvèrnman la désid fé zékonomi akoz, i prétan, lo bidzé la sékirité sosial lé a sèk. Sak i sava pran lo shok sé la santé dmoun. Lo tik-tak lé sinp : konm dabitid, i fo fé pèy lé z’ot san toush bidzé l’État, san toush bann moun nana lo pourkoi an kantité.

Na in koup de tan, la désid pi ranbours sépa konbien médikaman : i di lo rapor kalité/pri lété pa bon. La fine mète franshiz déssi bann boite médikaman, déssi transpor bann malad. Astèr, i vé la sékirité sosial i okip pi zafèr linète, zafèr lo dan : bann mitièl na ka fé lo nésésèr vik solon Roselyne Bachelot, zot nana lo moiyin.

Tousa akoz l’asirans maladi lé an défisit ? Alé dormi don ! Si l’État, konm in ra d’magazin, téi pran pa pou li sak i rovien pou la santé, sète-la noré té plis k’an bénéfis : nou la fine anparlé sa.

A fors fé konm sa, zot va niabou démonte sak Jospin la mète an plas : in bon pé dmoun i fèr ar pi zot soin. Lo dan sar plizanplis kariaté ; lo bann dantié va shap dann zasiète manzé : soso mayi va artourn a la mode. Sak na linète i sanz ar pi, bann marmay sar malizé aprann lir.

Si i kontinié démonté, lo sistèm santé va fini konm in vié loto, d’si kès.

Justin