Oté

« Afors frékant lo shien ou a gingn lo pis. »

In kozman pou la rout

Témoignages.re / 19 zwin 2019

JPEG - 43.6 ko

Figir azot moin la trouv sa an parmi bann kozman La Gwadloup mé zot i koné sa sé in kozman demoun i di galman dann La Rényon. Final de kont in pé partou : partou ousa néna lo shien é partou ousa néna lo pis. Mon Dyé Ségnèr, amontr amoin in l’androi lo shien néna poin lo pis, ni karapate non pli, ni tout sort béstyol i pouri la vi konm fourmi rouz lo gro épi lo pti... Sans prop, la pa bézoin ou lé tro instruiyé pou konprann sa, mé sans figiré ? A ! Sète-la demoun i ansèrv in bonpé : bann momon i di zot garson sa pou ésèye kal son mové frékantasyon. Bann fam i di sa zot mari, zot i pans li lèss ali antréné. Mé solman souvan défoi demoun i konfonn l’antrénèr avèk l’antréné. Bann momon i pans konmsa ! Bann madam i pans konmsa. Finalman, rant dé moun, sansa plizyèr alé konète ki i antrène ki. An touléka lo rézilta sé k’i ariv a fèr mové zafèr. Alé ! Mi kite azot rofléshi la dsi é ni artrouv pli d’van. Sipétadyé !