I paré bann moun La Frans i vien fou-fou kan la nèz i tonm pars d’apré sak i di zot i pans pa sa i doi ariv in zour. Alé oir dann désèrtin péi demoun i prévoi an avans kosa zot va fé kan la nèz va tonbé. Dizon zot néna z’ot fèye dé rout dann in ka konm sa. Dann la Frans non, pars i diré bann fransé i pans, dann z’ot péi, nora touzour lo bo tan. Gro plui lé konm in l’aksidan pou zot ! La nèz lé konm in l’aksidan galman ! Tout bann mouv man la natir sa sé bann z’aksidan !

Dann La Frans solman ? Non isi La Rényon nou la vni parèye koméla. Ni antann la radyo, sansa la télé i di anou kosa i sava arivé é koman ni doi débarbote anou. Si i di pa nou, ni gingn pa, nou lé konm demoun néna mognon dan la tète-dizon nou lé andikap mèm si nou néna l’èr an bone santé, bien korporé éi bien préparé pou fèr fas. Mé ni fé pi fas ditou ! An touléka, pou in bonpé rant nou !

Moin la fine dir azot avan kan la plui téi ariv, nou téi mète nout fèrban, sansa nout bak a anparé é konmsa nou lé sir nou té i mank ar pa d’lo pou inn-dé zour. Mi rapèl galman kan siklone té i ménas nou té i pran nout prékosyon : klout plansh dsi la fénète, dsi la port, si i fo mète gro rosh dsi lo toi. An touléka nou té i kont pa ni dsi lo mèr, ni dsi gouvèrnèr, nou té i pran nout prékosyon par nou mèm.

Parèye pou la maladi : nou té i fé nout soni konm ni pé. Mé sirtou, si l’ariv in mortalité, nou téi fé pa konmsi lo syèl té l’avé tonm dsi nout tète. Lé vré nou té i viv avèk la fatalité, pa konmsi nou lété protézé kont tout sak i pé é i doi arivé... I diré, in bonpé rant nou, koméla, i koné pi pran nout résponsabilité. Konm moin la di dann kozman zordi, nou lé bon pou asiz dsi ti-ban, pars ni konfyé lé zot lo soin pou okip de nou.

Pou kosa mi di sa ? Pars afors kont dsi baton tonton pou travèrs la rivir v’ariv lo zour ni gingn ar pi pass la rivir ditou.