Oté

« Afors sèr zanfan dsi li, Zako la tyé ali »

In kozman pou la rout

Témoignages.re / 17 mé 2018

JPEG - 43.6 ko

Pou sak la pa konète tan-la, dann zardin l’éta, l’avé in sinz demoun téi apèl Zako dann in kaj é li téi viv toultan la-dan. Avansa, a s’ki paré, mé moin la pa vi, li téi viv dann lo kaj avèk son pti épi in moman zako. Biensir l’androi té i konvien pa zot avèk bann marmaye konm lé malis anplis, téi bonbard azot kou d’grin boushon. An touléka kan moin lété dann klas sizyèm té i rès solman inn : in mal Zako. Demoun té i koz, téi rakont tout sort kalité z’afèr… Mèm ké lo momon téi sèr toultan son pti dsi li ziska in zour lo pti lé mor é lo madam Zako la kontinyé pèz son pti dsi li. Kèl moral néna ladan ? Sinploman kan ou i vé fé tro d’bien out zanfan ou lé riskab fèr azot lo tor. Alé ! Mi kite azot rofléshi la dsi é ni artrouv pli d’van. Sipétadyé !