L’èr lèv la séanss l’arivé, Paul avèk Elie la lèv zot balo la parti. Prèss arivé déor in vyé mèr, frodèr, mé sirman kalifyé dann la pratik noute lang la di avèk noute kamarade : « Wi kroi nou la tyé kouyon pou pran son plass ? » Léspréssion lété zoli é l’èr pou bataye lété fini.

Mé wala pou kossa mi di azot sa ; pars so matin épi d’ote zour mi antann dsi in radyo pèrkal demoune apré di : akoz i mète pa bann zétranzé kriminèl an prizon dann Ruanda ? Konmsa i dépanss ar pa larzan konm koméla dann bann prizon sink étoil épi va fé travaye azot konm bourik é sak nora pa dépanssé konm larzan, lo sirpliss v’alé goumant larzan bann rotrété.

Bien sir sa i fé panss amwin kozman mi sorte di la… mé sak i fatig in pé mon tète sé kan i di sa pars i obliye sé l’éta k’i doi assimé lanmprizoneman demoune kondané par son prop zistiss. Normal sa sé in prérogativ l’éta é li pé pa défoss dsi in n’ote péi.

Sé mon promyèrman mé mon dézyèmman lé dékourazan ossi pars pou kossa i ramass pa zinpo bannrish i doi ? Pou kossa i ramass pa larzan détourné ? Pou kossa i domann pa lo kapital ranbours larzan lésploitassion bann travayèr. Wala bann manyèr épi d’ote ankor pou vèrss in rotrète konm i fo bann travayèr azé.

Antouléka kan wi antan sa, wi panss lepen la fine ranporte bann bataye zidé pou k’in sinp rotrété oki konm job i pran in rézoneman konmsa avèk lo fron nassyonal. Mé antanssion bann zabizèr d’panssé, bann détournèr d’panssé, pars finalman la pa bann rish va péyé mé bann pov la plipar d’tan.

A bon antandèr, salu !

Justin