Tèr la mi sort argard in sobatkoz dann télé, si lo télé piblik, té si zéléksyon pou shwazi bann konséyé pou lasanblé départmantal lo 22 èk lo 29 Mars, pa promié fwa lo télé an késtyon i roganiz in sobatkoz la d’si, dézyinm mi krwa. Vik i vyinbou pa rogroup tout kandida si minm plato an minm tan dann minm télé , néna tro, néna 128 kandida o total, dikou la invit in dé parti politik. Mé mondié ségnèr, mandoné mi konpran poukoué nout péi lé dann in linpas, poukoué ni avans pi ni dovan ni dérièr.

Lo lémisyon la éklèr in pé mon lantèrn si nout bann dirizan potansyèl konm i di. Pou mwin lo lémisyon navé ni gou ni santiman, shakinn la tir dan son sans mé navé pa inn pou tir dann lo bon sans. San mépriz lin a lot, an mwin minm mi di, si ni sar mèt nout déstin dan la min banna, bann moun la sobat a swar, mondié ségnèr nout kanar lé nwar. Pa inn la nyabou fé in bon propozisyon pou détak nout baro. Pa inn la gingn soulèv in lièv, kansréti pou nou pa pèrd lo gou. Pa inn pou rolèv lot.

Pwatan lo zournaliz la pa mank domandé, koué i fé domin si zot lé éli ? Donn a nou lo program lin a lot. Vik zordi néna in ponyé parti politik, i dovré an awar in ponyè program. Sanm pou mwin sa in zéléksyon i ral pa tro, néna i di pou rézon, nou néna tèlman si lo kèr dopi kèktan, sépousa ni vot pi. Ousinonsa si mi vot, mi vot pou lo pli pir. Ankor in sominn pou diskité pou dovré, banna i di aforss, aforss diskité in zour na war féklèr !