Mi pans zot tout i koné kozman-la. Mi pans zot tout i koné kalbas : sa i ansèrv pou fé bob, sa té i ansèv pou ramas gro sèl, lo grin, in pé tout. Sa té i ansèrv osi pou alé rode dolo la sours,.. mé in zour, afors alé rod dolo, kalbas i fini par kasé. L’èr-la, té i falé rod in n’ot kalbas sansa in n’ot résipyan. Ala lo sans prop ! Mé konm sé in provèrb nana osi in n’ot sans : i vé dir konmsa afors abizé, in zour demoun i révolt... révolt ? Sa in n’afèr ni koné bien La Rényon é pa arienk zordi.

Zordi bann marmay lékol i révolt pars i fé tro sho dan lékol dopi moi d’désanm ziska moi d’févriyé, mèm komansman moi d’mars. kisa l’otèr ? L’otèr sé l’édikasyon nasyonal la désid rabiout vakans la shalèr, pou in rézon nou va pass dési zordi, mé nou va anparl pli tar.Afors rabiouté, téi vé mèm fé la rantré 14 janvyé. Si kalbas i pète, ni pé di sé par l’édikasyon nasyonal. Arzout èk sa lo klima i éshof. Sa toulmoun i koné. é sèt ané i fé pli sho ké toultan… mé l’éshofman klima la pa fini. Konm di bann moun i koz bien : la pa in trikmardaz konzonktirel, mé sé bien in kékshoz striktirel. Donk sé pa in kou d’azar mé in n’afèr i sava kontinyé.

Zordi bann zinportatèr lésans épi bann éstasyon sèrvis l’apré pran la popilasyon an otaz - la pa mon abitid koz konmsa, mé akoz pa koz konmsa. Zordi na in pé i di zot lé kont lo monopol la SRPP. Dakor, mé koman i sava vanj kont sa ? Pèrmète d’ot zinportatèr fé vni lésans ? Sa lé in pé kourt konm zidé ! Zot i pans pa sré pli valab si té i dévlop lé z’ot zénèrji é pou vréman pa pou fé sanblan ; pou vréman lo solèr é pa pou fé sanblan, pou vréman lénèrji lo d’mèr, pou vréman lo van, pou vréman lénèrji zéotèrmik... Kan dmoun sar fine bien konprann sa é bin la sityasion sar pa aksèptab. La kord i pète koté li lé faye ! Aforstan alé a lo kalbas i pète !

Justin