Mi koné pa si zot kaz néna vyé zoutiy pars koméla kant in n’afèr i viéyi demoun i jète mé lontan téi jète pa. Si lété in si lo propriyétèr téi agiz sa avèk tirpoin si tèlman lo dan té i fini par iz moityé, défoi téi kass mé sa téi anpèsh pa ansèrv ankor in pé lo zoutiy. Sa lété dann tan gaspiyaz té aboli ! Mé, dann nout patoi la poin sa : li vé dir sinploman si ou i ansèrv kékshoz san arété in zour li lé pi bon. Izé ! Izé ! i fini par izazé ! Normal ! Mèm la vi lé konmsa : in zour li arète é lo méyèr doktèr i yinpabou sov aou. Lé vré pou la frékantasyon, pou l’amityé, pou l’antant dann ménaz… Alé ! Mi kite azot rofléshi dsi nout kozmandi zour é ni artrouv pli d’van. Sipétadyé !