Pars « pi d’koulèr » pou vréman sa i égziss pa. Dann la lang bann franssé i di lo linz lé délavé é pou nou sa i vé dir linz la fine si tèlman détinn par dsi détinn — passé par dsi passé-lé pi possib konète son koulèr d’orizine.

Souvan défoi sa i parvien par lo bann lavaz linz la konète osinonsa la tanpératir d’lo, osinonsa lo mélanz linz dann la mashine.. In zour laba dan la franss mwin lété la kaz in famiye é la mète mon linz dann mashine é mon shomiz la sorte konmsa : roz li la vni blan blan, rouz lo bann bouton la vni marron. Anfin li l’avé pi d’koulèr konm mi sorte dir anlèr-la.

Alor la famiye pou anonss amwin lo lévènman la di : « Mi sava fé rir aou ! Rogarde koman out shomiz i lé ? ». Mwin l’avé pa anvi rir mé kan mwin l’ariv La Rényon, mon momon la di amwin : « Mon anfan wi sava pa mète linz-la, wi oi bien sa la pi d’koulèr. »

Alé ! mwin la rakonte azot listoir mon shomiz — dizon inn noss avèk in ké d’mori — k’i fé k ‘ni artrouv pli dvan, sipétadyé.

Justin