Kossa ? Lin kroiyab pou vréman. Lé vré mi sava pa la rézyon konm i sava la boutik, mé kan mwin la parti é sa l’ariv amwin inn-dé foi kan Didier Robert lété prézidan é mwin la romark laba l’avé joli-jouli zafèr, épi bien komode pou fé lo travaye – in pti roprosh, pou mon gou, mwin la trouv té in pé sirsarzé konmsi l’avé vouli mète tro d’moune dann in landroi trop ti : lo vide avèk lo plin sa i fé larmoni é mwin la trouv sa lété in n’afèr k’i manke in pé.

Toute fasson, lo mèbe sa i rande pa ou pli intélizan, pli éfikass, pliss an kapassité pou fé oute travaye mé sa lé kant mèm bien nésséssèr. An pliské sa, ni koné la Réjyon sé landroi ni pé trouv lo pèrsonaz lo pli inportan pou La Rényon : landroi-la nou la trouv Mario Horau, Pierre Lagourgue, Camille sudre, Margie sudre, Paul Vergès é an dèrnyé Didier robert, ziss avan Huguette Bélo, demoune i konte dann lo dèrnyé pèryode nout listoir. In androi i fo réspékté, pars an pliss akoz pa domin nou rényoné ni sava trouv noute Prézidan sansa noute Prézidante avèk lo pouvoir k’i fo é lo préstiz ni doi ratash inn pèrsne konmsa.

Méprize ali sé konm méprize noute péi épi noute pèp. Ala pou kossa sak la bande Didier Robert i shoke amwin konm i doi shoke bonpé d’moun issi La Rényon :

Lo bande mèb la prézidanss l’avé disparu, lo bande sal lété vide, fotèye kassé par issi par laba, vyé tab, in zour modi pou noute péi, pou noute pèp, pou La Rényon. Parl pi lo sistème informatik la prézidanss démonté, alé oir toussa-la l’avé fine péyé é par arienk avèk la krash konm mwin la antande dir. Bien sir sak l’arivé i dégrade sak la fé é sak la lèss fèr.

I fo ni souvien d’sa ! i fo ni fé konète sa ! Sak la fé é sak la déside fé, i doizète dénonssé. Na poinn pardon pou in lofanss konmsa.