Mésyé, Médam, La sosyété koz èk moin sé koz èk in kouyon-sé o pyé d’lo mir k’i oi lo mason. Zot i koné bann rolasyon dann in sosyété sa la pa fasil ditou. In rézon, pars ou i koné pa forséman la pèrsone ou i adrèss : kosa èl i vé dan la vi, kosa i kont plis pou èl, nèf foi dsi dis ou néna dé shans pou tronpé. An touléka néna in n’afèr i fo manyé dousman, ti-dousman, sé kan ou i di non. Avèk oui na poin bataye, mé avèk non i gran parkour i komans sirtou si la pèrsone i invite aou kisoi pou alé an parti, kisoi pou vni in pti fète. Mi pans i fo pa di non konmsa « sèk » : si sé oui sé oui, si sé non i fo rode in léskiz é sirtou ké lo léskiz lé valab pars la pèrsone i pé rodé é si la pa vré ébin mi rakont pa ou.. Zot i koné néna dann bann éstaz travaye inn éksopré pou aprann dir non..sé dir si sé in n’afèr konsidéré konm difisil. Pars in kréol ou la di non, dann son kèr li pans : promyé é dèrnyé foi ou la di amoin non. Na pi d’proshène ! Alé mi kite azot rofléshi la dsi é ni artrouv pli d’van. Sipétadyé !