Sa lé vré pou vréman pars sansa ou sar blijé krak in n’ot zalimète pou alime out bouji. Mé ni koné bien nout kozman-la, sa sé in provèrb é konm provèrb li néna in sans i dépass lo késtyonn bouji épi lo késtyonn zalimète. Si ni rode bien lo sans kozman-la, ni pé dir kan ou i fé in n’afèr é si ou i avans bout par bout, i fo ou i rogard bien si in bout lé fine bien fini avan pran lo bout k’i suiv. In simp lojik, zot va dir amoin ? Mé la plipar d’tan, dann in n’afèr, sé la lojik sé sak i fé défo. Sé pou sa nout kozman lé inportan… Tout fason, kan ou i fé kékshoz i fo ou i avèye bien si out afèr i progrèss bien konm k’i fo. Alé ! Mi kite azot bien rofléshi la dsi é ni artrouv pli d’van. Sipétadyé !