Kan i koz, i koz avèk la boush é la boush i koné pa l’ortograf. Kan i koz i di sak lo zorèy la antann. Pou kosa mi di sa ? In lébzanp : kan i di la rout lé asphalté, in pé i konpran lé alfaté. Pou sort alfaté pou ariv galfaté la pa bézoin alé tro loin. Mé lo mo galfaté i shanj de sans avèk lo moun k’i di sa. Ou i pé antann in momon di son z’anfan alé lav son min pars lé galfaté avè la bou. Astèr lo sans lo mo i sava in pé pli loin : galfaté sé fé roul aou dann la farine. L’èr-la sa i vé dir, antansyon demoun va roul aou, va tronp aou, va fé babane avèk ou é sé konmsa ké ni sort l’asphalte, pou pass par la salté, pou ariv la malonèt-té.

Kosa zot i anpans ? Arien ditou ? fé travay z’ot koko ! Fé bouy z’ot matyèr griz ! zot va oir ké, rant-rant, ni pé z’ète, tazantan, d’akor rantre nou.