Mwin la antann dann zoinal parlé, dann télé, konm dann radio épi mwin la lir konm zot déssèrtin zartik dann zoinal épi dsi lintèrnet, Air austral lé dann difikilté é li la bézwin in gro kou d’min pou travèrs in parkour diffissil. Lo gro kou d’min ni parl la, sa sé La Région la donn ali sou la form 95 million l’ëro, si i konte pa in sibvansyon déguizé la Région i vèrs dopi dé zané é dé zané é i apèl sa lo l’ède pou la mobilité.

So matin mwin la antand dann in radyo in moun apré di finalman so l’ède la mobilité la ansèrv arienk pou finans bann konpagni laviyon san fé zoué réèlman la konkiranss é donk san bèss lo pri bann biyé l’aviyon…élémantèr mézami, pars ni wa bien lo pri bann biyé l’aviyon i bèss pa, é la konkirans rant bann kopagni aèryène lé pliské bon anfan, é sré mèm kékshoz k’i rossanm in koluzion. Mé pétète in pé va di : sa sé bann mo k’i fash ? Mé dizon i fash sirman toute sak i arète pa dopi dé zané é dé zané tranp zot pain dan la soss kanar.

95 milyon, pluss, pluss, pluss, sirman sa in bon nouvèl pou Air austral, mé an mèm tan néna in n’ote bon nouvèl-si Air austral i pran ali konmsa, é kossa i lé ? Ni oi ariv dopi lo pli profon lorizon In kalité lantante an misouk rante Air austral épi Quatar airways. Anfin demoun i an parl, mé mi wa pa tro bien l’afèr pars si mwin lété Lo quatar airway mon l’apéti n oré té pli gran k’sa : mwin lété ! Air France mwin noré dann l’id d’kapé. Tan k’a fèr si ou néna l’apéti, akoz ou va kontante aou in sinp biskui alé oir néna in gro ropa i atann aou. O pli ofran bien antandi !

Astèr lo bann brui lantante rant band quatari épi Air austral, lo pli pti i doi méfyé ali. In sinp késtyonn lojik ! Dann Témoignages i di bien domand Air seychelles sak l’ariv ali kan li la vouli frikote avèk in gro konpagni ranpli a koute pétro dollar. La lojik, lo gro la krok lo pti épi li lé paré pou tak baro. Zot i panss nou lé métyèr zot ? Nou la sèye manz Air Made é la fini par in kalsh. Nou l’ashté laviyon pèrsone téi vé pi. Nou la modifyé o kapital Air austral é nou la nyabou roul in pé dan la farine. Zordi ni mète larzan dan la tire-lire é ni sava domannd siouplé Quatar airways… Konm i di dann provèrb : « si wi vé manz avèk Grandyab, pran out gran kiyèr, lo pli gran ké wi pé trouvé ! » é anpliss ké sa lé pa gagné d’avannss.