Médame, zé Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami kan ou lé pti néna dann oute tète in paké kozman. Kozman-la i évite aou tro fé travaye lo koko, épi donn in réplik pli vite possib, pou pa pèrde la fass dann in sobatkoz avèk in ote marmaye. Mwin pèrsonèl mi yème bien bande kozman–la pars sa i klotire in diskissyon ki pé z’ète in komansman d’dézorde, mèm konm i di tourn-o-vinèg. Sak mwin la marke zordi pé s’fèr pti marmaye koméla i ansèrv pi bonpé, pé s’fèr galman mwin la fine marke sa dann nout zoinal, mé la pa pou sa k’i fo mi anparl pa. Zot i koné La pa zéspréssyon i mank anou, nou néna mèm in gran kantité pli zoli lé z’inn ké lé z’ote, pli éfikass lé z’inn ké lé zot épi sa i partissip nout kiltir kréol rényoné. Gardien azot, sé gardien la rishèss nout lang, rogoumante azot sé anrishi lo zoutiy lé a nout dispozission. Alé ! Mi kite azot rofléshi la dsi é ni artrouv pli d’van. Sipétadyé.