Mi koné margoz lé amèr. Lo grin lé dou ? Mi koné pa ozis pars moin la zamé mète in grin margoz mir dann mon boush. Pou lo rasine, sanm pou moin li néna ni gou ni santiman ! Mé la pa sa mi vé an parlé. Mi vé anparl lo lésprésyon nou la antann souvan kan nou lété pti, pétète in pé rantre nou i di sa z’ot zanfa sansa z’ot ti zanfan l’èr ki lé. Dizon, sa in manyèr pou ropous in bann késtyon tro kiryé in marmaye tro fourné i arète pa pozé. Lé vré marmaye lé fourné ! Mé bann gran pèrsone la pa fourné zot ? Biensir zot lé fourné, mé zot i pans zot na lo droi par raport lo privilèz l’az. Alé ! Mi lèss azot rofléshi la dsi é ni artrouv pli d’van sipétadyé.