Oté

« Akoz ? Akoz margoz lé amèr, mé lo grin lé dou é la rasine lé plate »

In kozman pou la rout

Justin / 1 octob 2019

JPEG - 43.6 ko

Mésyé, médam, la sosyété : koz èk moin sé koz èk in kouyo n-sé o pyé d’lo mir k’i oi lo mason. Zot i koné bann marmaye i poz bonpé késtyon : pou kosa tèl shoz ? Afèr i fé sa ? Pou kosa l’apré fé in n’afèr konmsa ? Ziska ousa i sava ? étsétéra-étsétéra-la ké lo ra . Finalman, la plipar d’tan bann paran i réponn in pé ninport koué pou dir lo marmaye : « Fèrm in pé out bèk siouplé ! ». Mé la plipar d’tan in répons konmsa i amène lo marmaye pou arpoz in n’ot késtyon é pétète plizyèr. Pou kosa ? Soi lo marmaye i vé savoir vréman, soi li vé oir si son paran i sède avan li, sansa si sé li k’i sède avan. Mi pans bann zamontrèr i yèm pa tro sa, li yèm pa répons konmsa é li profèr ou i diskite avèk bann zanfan. Mé si ni rogard bien, lo répons lo paran la pa si inbésil ké ni kroi . Pou kosa ? Pars si shak gou lé roprézanté, sa i vé dir, tout lé pa iniform dann la natir konm dan la vi. Néna i varyété é la varyété sé la rishèss é li lé pli siper ké l’iniformité - i di pa l’annui lé né avèk l’iniformité ? San foi la varyété ké l’iniformité. Alé ! mi kite azot rofléshi la dsi é ni artrouv pli d’van. Sipétadyé !