Oté

« Akoz fé toutsuite, sak wi pé fé talèr »

In kozman pou la route

Justin / 17 avril 2021

JPEG - 43.6 ko

Médam, zé Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo vré masson. Mézami kozman mwin la mark an-o la, i pran lo kon tropyé, proverb fransé k’i di : i fo zamé romète pou landmin sak wi pé fé lo zour mèm. Kissa rant nou la pa di, in foi sansa plizyèr, nou va oir sa domin ! Mi panss mon band proféssèr dann tan mwin lété marmaye lékol, mon band paran kan mwin lété dsou zot toi téi yèm pa tro sa. Mi antan déza d’issi kozman mon momon kan èl té i di konmsa : intèl lé néglijan ! Mi panss èl i dové kalkil mon papa lété néglijan, vi k’li téi atann dèrnyé moman pou fèr kékshoz li l’avé pou fèr. Mézami m’a dir azot mi yème romète puo landmin pars sa i done amwin in sèrtin konfor, mèm si domin lé riskab done amwin in doz lo stress. Mon néglizans sé in défo mi aprésyé shé mwin, é pa arienk zordi, de tou tan lété konmsa. In néglijan néna lo tan, li pé konm i di diriz son l’anploi di tan, é sirtou pa tonb dsi la koupe demoun pou fé sak li néna a fèr l. Mi kite azot rofléshi, mi panss in bonpé rant zot i panss pa konm mwin, mé mwin mi pans pa fé lèv mon kardyak pou sa. Alé ! Mi kite azot rofléshi la dsi é ni artrouv pli d’van. Sipétadyé.