Na poin lontan l’avé in tab rone dann télé dsi la késtyonn travaye. L’avé plizyèr pèrsone téi koz in lang an or. La n’avé kalité diréktèr, diréktèr l’adzoin, sindika… An tou lé ka, in bann ga té i koné z’ot afèr é arienk z’ot kozman té i amontr zot lété o kourann z’ot afèr. In sèl z’afèr, la kass amoin in pé : dann lo group l’avé poin in sèl shomèr, in sèl domandèr l’anploi. Tout banna té I travaye d’apré sak moin la fini par konprann !!!

Konm de koi téi domann pa ou d’ète shomèr pou parl dsi lo shomaz.

In n’ot zour la fé in sobatkoz dsi l’ilétrism. L’avé plizyèr pèrsone téi koz d’or, mi di azot. Mé d’apré sak moin la konprann, tout banna té i konète bien lir épi ékrir, épi roul z’ot fransé. Mi diré mèm in pé dan la bann l’avé bak+++ é sof l’intéré zénéral, zot l’avé poin vréman in l’intéré pèrsonèl pou élimine l’ilétris isi La Rényon.

Konm de koi la pa bézoin ète ilétré pou konprann doulèr in sityasion konmsa.

Parl pi bann sobatkoz lo soir zéléksyon. Nana la dan, arienk demoun la voté. Mèm pa i vot an blan, mèm pa in l’abstansyonism. La plipar té in bann shèf parti é. Z’ot diskisyon, akoz nana si tan tèlman l’abstansyonis ké sa ? Pou ma par moin la pans bann moun la té apré koz dsi in sizé zot lé pa si tèlman familyé.. Zot va domandé pou kosa mi anparl de sa, konmsa, Mon répons lé sinp : akoz la pa invite demoun lé vréman itérésé pou diskite dé shoz i intérès azot.

Ankor in foi l’avé fé vni bann moun i abstien pa zamé pou parl l’abstansyon…

Pétète sé pou sa Paul Vergès, dann tan li lété vivan, la zamé invite ali pou parl dérègloman klima . Li lété sirman tro intérésé é tro intérésan pou anparl de sa.