Oté

Akoz krokodil i manz pa zamé poul !

Justin / 9 févrié 2019

JPEG - 43.6 ko

L’avé inn foi in poul bien gra, bien ron l’avé dann son zabitid, désann bordaz lo flèv, dann in péi l’Afrik i apèl Sénégal pou rode son manjaye. In krokodil téi rogard ali pasé épi téi di dann son kèr : « Poul-la lé gra, i fé l’èr k’lé bon a manjé é moin pèrsonèl moin la si tèlman fain, mon léstoma i désann dann talon. In kroiyab konm moin lé anvi manz sa. » .
L’avé inn foi, pou inn bone foi, mésyé lo foi, la manz son foi èk in grin d’sèl .

In bo zour krokodil l’akost lo poul épi li la di : « Inkroiyab konm moin néna l’anvi manj aou. Ou lé si graé, si ron, sanm pou moin ou lé sakréman bon pou manzé. ! »
La poul i mète a kriyé épi i di : « Krokodil, ou i pans pa kant mèm manz amoin ? Par papa épi par momon épi par nout gran famiy ovipar, mi tonm out sèr. Ou i pans kant mèm pa manz out sèr ? Pars sansa ou nora malèr ziska lo vinn-troizyèm zénérasyon, pou ou, out zanfan, out ti zanfan épi lo pti out ti zanfan. Ou i rann aou kont tousa malédiksyon i sava tonm dsi bannfamiy krokodil.?
Krokodil dann son kèr i di : « Kosa, sa inn krak sa ! Mi viv dann lo pi poul viv dsi la tèr. Ni rosanm pa ditou inn a l’ot é oila ké so volaye stupid i prétan dir èl sé mon sèr. Sa in bob sa, domin m’a manz ali ! Mé kan li la vi aèl landomin, poul la mète a kriyé, shanté, kakayé pli for k’dabitid. El téi kriy : « Moins é son sèr, é oila ké li vé manz son sèr. Koman in zanimo i pé an avoir in si pti pé la konsyans. Moin sé son sèr ! Moins é son sèr ! »
Kriké Mésyé ! Kraké madam !

Konm zanimo té i komans rogard krokodil an ki d’ta bouète, krokodil la koul dann lo épi la baré. La nuite li la pa gingn somèye mèm in pti grin é granmatin li la parti oir Mbanbi in spès gran lézar épi li la di :
« Mon frèr Mbanbi, moin lé bien trakasé, i fo mi di aou kékshoz pars sak mi sort aprann i boulvèrs amoin pou d’bon : moin la trouv in poul bien graé épi bien ragoutèz é moin la bien anvi manz aèl. Mé oila k’èl i di èl sé mon sèr é moin sé son frèr. Manz inn-a-l’ot rant frèr é sèr, sa sé in n’afèr i fé pa. Dayèr la moral i défann fé sa. »
« Koman mi pé z’ète son frèr ? Mi viv dann lo é èl i viv dsi la tèr. Lé inposib son n’afèr-la ! Sa sé kaziman in bob sa !.
Mbanbi lo lézar la fé ali in répons ranpli avèk la sazèss : « Kroko mon zami, mon frèr, ou i koné kanar ? Kanar i viv dsi d’lo épi li ponn do zèf. Poul i viv dsi la tèr épi li ponn dozèf. Aou mèm ou i ponn pa ou ? Moin Mbanbi, mi viv dsi la tèr mé mi ponn dozèf. »
« Fason k’mi oi nout kat lé sèr frèr, é ni fé parti lo grann famiy bann ovipar. Poul la rézon é moin néna mèm l’avi ké li, é ou sré bien saz an avoir lo mèm avi »… Krokodil la kalkilé, kalkilé, kalkilé mèm épi li la di dann son kèr : « Mbanbi sé in vré zami é sak li di la pa pou annuir amoin, Donk Poul sé vréman mon sèr é mi manz ar pa èl ! Mèrsi Mbanbi ! Ou la anpèsh amoin fé in péshé mortèl »
Ala pou kosa dopi dé tan é dé tan krokodil i manz pa poul inn tyork.