Zot i koné dsi internet é sirtou dsi face-book, néna tout sort éspès de shoz. In pé lé vré, in pé lé mantèr, in pé lé égzazéré. Sa ni koné é alon sèy paf é prann anou dann la la mansonjri, sansa sinploman lo kasaz lé kui.

Mé Khadafi lé mor pou vréman, nou la mèm vi dann télé kélkin apré donne ali lo kou d’gras. Sé pa si zot lé konm moin, mé so zour-la moin té pa bien. Pa bien pou kosa ? Pars zot va dir amoin sa in mor an parmi d’ot ; é lété pa in saint, biensir. Mé akoz la pa arète ali pou fé son prosé ? Li l’avé dé shoz a dir, zot i kroi pa ?

Zordi nana dé zistoir k’i kour la dsi : inn i di li la ède Sarkozy pou fé son kanpagn pou z’éléksyon an donan in gro paké l’arzan. Vré, pa vré ? Mi koné pa, é mi vann azot sa konm moin l’ashté. Dé, é sa la mète dann zournal : La Libye l’avé in gro éstok l’or é l’arzan é avèk sa li té i propoz bann shèf d’éta l’Afrik pou fé in bank, fé in moné, é débaras azot lo traka zot nana avèk lo fon monétèr intèrnasyonal (lo FMI) konm avèk La Frans k’i kontrol lo fran CFA.

Atak La frans-afrik épi lo FMI, sa sré in pyèz mortèl é si lé vré, ala ké lo pyèz la rofèrm dsi Khadafi. Ala pou kosa plito k’arète ali, la tyé ali. In zour, la pa domin, mé pétète apré, va oir klèr la dsi.

NB I fo dir galman, dopi zénéral de Gaulle, tout bann prézidan la touzour majine ké san La Frans-afrik l, La Frans té riskab ète in puisans ségonn zone. Alor, ni pé dir Khadafi lé pa mor initilman pou sèrtin touléka.