Oté

Akoz ni souète pa ké lo méyèr I gagn é I fé gagn l’amityé rant bann pèp ?

Justin / 9 zwiyé 2018

JPEG - 43.6 ko

Kan I ariv in gran konpétisyon konm koup di mond fotaball, dabor néna soisant milyon séléksyonèr. Pou kosa ? Pars dan La Frans néna soisant milyonn moun é shakinn néna in lang é shak lang néna son dé mo pou dir é pétète plis. Si tèlman ké si ou i ékout sak lo bann lang néna pou dir, lo lékip La Frans lé pèrdi. Konm avan la koup di mond 1998 ! Apré, sé in n’ot afèr : si la gagné toulmoun l’avé fé in bon diagnostik. Si la pèrd ! Kosa in bann brankignol konmsa té i sar fé laba dann in gran tournoi konmsa ?

Sa sé pou di mon dé mo dsi lo fotbal : dé mo solman pars mon disk dir lé pa monté dsi in program konmsa.

Mé an déor d’sa, néna in bann pèrnisyé i profite lokazyon pou amontr z’ot patriyotis fransé, in pé gro doi, in pé limité é sans nyans. Suivan sak zot i di : i fo ète pour La Frans, sansa shanj péi, alé aou ousa ou i vé mé sort la. In drol poinn-ropèr kant mèm kan ou i shoizi in éspor pou amontr out z’idé politik. Pou kosa mi di sa ? Pars sanm pouin kozman konmsa lé in pé kourt. Akoz shanj péi si ou lé pa pou lékip fotbal La Frans ? Akoz shanj péi si ou i krétik sak La Frans la fé par isi sansa par laba ? Mi pans ou i pé z’ète kont sak out péi la fé par ébzanp dann bann guèr kolonyal avèk bann masak konm sak la spasé l’ané 1947 dann Madégaskar.

Myé k’sa, si ou i yèm out péi, mi pans ou na rézon si ou i aprésyé pa sak gouvèrnman out péi la fé momandoné. Nou la pa défil dann shomin kont bann loi Raffarin, zordi ni défil pa kont bann loi Macron ?

Alor, bann fransé san pour san, avan dor sak zot i di dsi lo fotball sré myé tourn sète foi z’ot lang dann z’ot boush. Konmsa zot noré lo tan anval in parol, anval in mo, pétète zot mèm, boudikont lé pa dakor ansanm. Sèl zafèr ni pé dir : alon souète solman dann l’éspor lo méyèr i gingn l’amityé rant bann pèp lé ranforsé.

Ni artrouv pli d’van sipétadyé.