Plantèr jèrniome, dann tan lontan, sa té in bon métié. Mèm si travay té dir, mèm si la distilasion lété délika pou bien réisir, si siklone la pran son par, mé la lèss la vot. Alor, kan ou la gingn in bone kantité lésans, out famiy lé kontan, son manzé lé asiré, é ou plantèr, ou lé fièr. Gonflé avèk larjan, out posh palto i marsh par-d’van ou !

Kissa i an souvien ankor le tan plantasion jèrniome té i pète an flèr, in pé partou dan lé o ? Kissa i rapèl lavé par-la sink mil plantèr té i fé sa ? Oui, san farsé... Bann zansien, sa lé sir. Zot i ansouvien. Bann jènn ? Moin lé pa sir zot i koné ankor kossa sa i lé.

Sof si zot la parti la foir Bra-Panon épi zot la vi in moun l’apré fé distilasion, sof si zot la vi bann moun déor apré vann lésans dann bann ti-fiol. Kan sikoungounia la fatig anou, pétète zot la antann parl sa konm in médikaman pou fé kour moustik.

Pétète ? Konm pétète pa ? Lé possib, mé lé pa sèrtin... vik lané 2007, la fé arienk dé kilo lésans. Sé dir k’lo zafèr té i sar mor pou d’bon. Poitan, a s’ki paré, na in sosiété dann Kanada i intérès nout jèrniome. Somanké na d’ot ankor i rod sa ? Tansion lé ga ! É nou, kossa ni fé ? Ni gingn pa nou ossi fé tout reshèrch k’i fo pou k’nout jèrniome, nout bon jèrniome, nout jérniome péi Bourbon i aport in pé la rishèss shé nou ?

Justin