Moin lé sir zot i koné kozman-la. Dabitid sé in kozman in pé an foutan pou in moun i fé l’èr i abuz in pé dsi ou, sansa i domann aou dé shoz lé pa a dmandé pars sé in lobzé d’valèr, an rézon li koute in bone some. Défoi i pé antann galman : « Akoz ou i apèl pa moin momon, sansa papa ? ». Zot i koné néna d’moun i pran la bonté pou l’obligasyon. Dann mon famiy néna in zistoir i sirkil. Mi koné pa si lé vré pou vréman. An touléka, lo zistoir i rakont in l’ansien ménuizyé, in kamarad l’avé domann ali in shèz. Li la fé épi kan la d’mann ali konbien i doi, li la réponn sé pou arien. Lèrla lo moun la di : « Si mi savé tégratuit, moin nora domann aou dë ! ». Alé ! Mi kite azot rofléshi la dsi é ni artrouv pli d’van. Sipétadyé !