Lakey lo sit > Chroniques > Oté
« Akoz ? Ou i pran amoin pou in shoval de boi nana lo né mé na poin l’trou d’dan ! »
In kozman pou la rout
mardi 23 zanvié 2018, sanm
Kan i parl d’in moun na poin lo né, souvan dé foi, sé in moun i pran pa la ont pou arien. Li fou pa mal d’in foutan ! Li fou pa mal galman d’in krétik sansa d’in kasaz lé kui sansa ti boi ! Astèr kan i an parl in shoval de boi, li nana lo né : sa lé sir ! Lo trou dann né ? Sa moin la pa sir ! An touléka li na poin lo né dann sans kozman moin la mark an o la. Konm i di, li la poin lo né… Solman, zot i koné, kréol lé souvan siséptib é li vèks pou in oui, pou in non, dizon pa pou gran shoz. Si tèlman li kroi demoun na poin pou li lo santiman solon li zot i doi an avoir. Si tèlman zot lé toultan dann in siséptibilité demoun malad. Moin lé sir, an parmi l’moun zot i koné, néna galmann d’moun konmsa é zot lé a d’mandé koman i pé géri in maladi konmsa. Alé ! Mi lèss azot rofléshi la dsi é ni artrouv pli d’van sipétadyé.