Oté

Akoz pa balèye dovan z’ot port san atann léskandal an tro ?

Témoignages.re / 11 juin 2020

JPEG - 43.6 ko

Mé zami, nou la fine anparl l’asasina George floyd par la polis dann la vil Minnéapolis : lo ga lé mor apré k’in polisyé la mète zénou dsi son kou ziska li pèrd réspirasyon épi li pass l’ot koté la vi. Mi pans tout léktèr Témoignages la vi sète afèrla .. Yèr aprémidi la fé lantèrman lo pov boug dann la vil Houston.

Pandann tan la, demoun i kontinyé manifèsté dann in pé tout péi kont lo rasism é kont la vyolans rasist. L’afèr lé si tèlman insiportab ké konsèye minisipal la vil Minnéapolis landroi la polis rasist la fé son krime, la désid disoud la polis la vil par raport li la fine ariv in poin li lé pi réformab. La prézidant konsèy minisipal la di va rofé in n’ot sèrvis d’ord mé sète la lé fine tro gangréné par lo rasism épi la koripsyon pou réform ali.

Dan la Frans bann manifèstan i ansouvien la mor in jenn téi apèl Houssana Traoré é i dmann zistis pou marmaye la mor dann in l’arèstasyon banna i apèl sa misklé… Mèm tan bann zournalis la trouv dsi bann rézososyo o moins dé site rasis ousa plizyèr milyé d’polis i pass lo tan pou moukate bann noir, bann zarab épi bann jitan é d’ot minorité ankor. Donk minis l’intèryèr lé blijé réaji é li propoz in plan pou d’apré li tir lo rasism dan la polis, épi évite bann métod danzéré la polis fransé i kontinyé itilizé pou arète demoun.

Mé oila plizyèr sindika polisyé i protèst pars d’apré zot la polis lé pa rasis mèm si zot i rokoné néna in minorité bann rasis anndan… Moin la antann dë sindikalis dann télé apré protèst kont lo projé minis l’intéryèr. Apré di lo minis sé zot patron é zot patron i doi prann zot défans épi ankor gouvèrnman i réaji tro vite san lèss lo tan o tan… L’èrla soriz dsi lo gato zot i parl nout viv ansamm san rasis, san vyolans initil. So viv ansanmla i komans fatig amoin sa.

Si zot lété saz, mi pans avan k’i ariv konm la fé dann Minnéapolis, zot i dovré komans balèye é bien balèye dovan zot port san atann lo léskandal an tro.