Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

« Akoz pa fé l’ékol kan i fé bon ! »

vandrodi 19 févrié 2016, sanm Justin

Pou la plipar d’moun, dopi finn moi d’mars ziska moi d’séktanm i fé bon : i fé pa tro sho, épi la poin bann gran kou d’plui-la plipar d’tan la poin siklone pou vréman. Solman l’ané éskolèr i suiv pa la sézon k’i fé bon é i pé dir bann marmay l’ékol i soufèr avèk lo gro shalèr, épi lo mové tan.

Moi zilyèt, moi d’août i fé bon donk lé bon pou bann marmaye bien aprann é malérèzman marmaye lé an vakans. Moi d’novanm, désanm, finn moi d’janvyé épi févriyé lo tan la pa bon pou bien étidyé é bann marmaye lé l’ékol. I rès azot in n’afèr pou fèr sé lite kont la shalèr an séyann ramas dé grin la konésans.

Ni oi bien si l’ékol nana pou travaye bien fé aprann bann marmaye, l’ané éskolèr lé pa fé pou sa. Nana in pé i domann l’ané klimatik mé a s’ki paré bann paran épi bann amontrèr i vé pa... Si sa lé vré é si bann paran i vé lo bien pou z’ot zanfan, é si bann amontrèr i vé bien travaye, nana in n’afèr pou fèr. I pé pa lès lé shoz alé konmsa sirtou ké lo klima i éshof é pou nou osi sar konmsa.

Si ni vé l’égalité d’shans, sanm pou moin, i fo osi l’égalité dann l’ékol. Sa i dovré fé parti l’égalité réèl. Zot i pans pa ?

NB : Dann désèrtènn parti l’Almagn nana in n’afèr i apèl Ferien Hitze-i pé tradui sa konm konjé pou la shalèr. Kan i fé tro sho, l’ékol i fèrm an atandan k’lo tan lé in pé méyèr… La Nouvèl kalédoni nana lo kalandriyé klimatik. Dann La Frans épi dann l’Erop osi nana lo kalandriyé klimatik. Akoz pa pou nou ?


Inn modékri, inn ti lavi, inn komantèr ?

signaler contenu


Facebook Twitter Linkedin Google plus