Dan la franss laba, i shanj prézidan shak éstan épi i shanj galman d’majorité mé lo bann projé kissoi bann projé d’ sirkonstanss, kissoi bann projé dsi lo lon tèrm ziska zordi i done pa nou satisfakssion. Prézidan i shanj sinkan an sinkan-avan té sétan an sétan, é lo bann majorité i shanj galman mé lo rézilta lé pa la. In pé i di i fo shanj lozissyèl, in pé i parl in mal dévlopman.

Nou néna, an parmi bann klass politik inn an parmi bann klass politik lo pli éspérimanté. La pa zidé i manke anou, la pa in vizyon dé shoz i fé défo, mé toulmoune i rokoné noute bann zinstitission lé pa sak i fodré anou pou nou avanss sèryèzman. Souvan noute kamarad Gironcel i parl d’in dévlopman par bann rényoné pou bann rényoné. Parti kominiss la fé vinn-sin k propozission é son bann propozission i sanm sa lé bon pou nou.

Tazantan lo bann politik droite konm gosh i rokoné k’i pé pi kontinyé konmsa- aprémidi-la mwin la antann lo Prézidan konsèy départmantal apré parl in projé rényoné pou amenn anou dann dévlopman… Sé pou sa, mwin lé sirésèrtin dann lo péizaz politik la Rényon néna sirman bann tandanss épi bann parti lé paré pou antann azot épi fé in bon plan d’dévlopman durab.

L’éta koué i fé li ladan ? Mi panss li ossi li souète dé shoz nou ossi ni souète alor konm di lo konte : ni antan pa pars noute toute lé dakor rantre nou ? Sèryèzman mézami, lé tan pou nou dévlope anou avèk in bon plan d’dévlopman ni pé fèr par nou-mèm éakoz pa inloi d’programassion pou mète sa an èv ? Akoz pa in statu k’i rokonétré noute majorité ?

A bon antandèr salu !