Mézami lé possib bonpé rantre zot i trouv drol, lo manyèr mwin néna pou prézante la lite rante dë mond, dë fassonn d’fèr, dë fassonn oir lé shoz épi dë filozofi boudikonte. Lé possib dann fon zot kèr zot i panss wala ankor in nouvo lépizode dan la lite rante po d’tèr épi po d’fèr é zamé lo po d’tèr i pé kroir li va gagné. Pétète rantre zot in pé i panss la médssine modèrn lé kapab kraz la médssine tradissyonèl san lèss ali lo pli pti shanss pou égzisté kansréti pou amontr son kapassité pou pran lo shomin lib dovan li é pou li avanssé.

Souvan dé foi mi antann demoune i ékri liv, i koz dann télé, i fé bann sobatkoz apré vante noute médssine tradissyonèl. Fransh vérité sa i rann amwin fyèr pars i mète mon péi anlèr. Solman,mèm sa, mi mazine dann lo passé é défoi ankor koméla, demoune i mor avèk bann maladi la médssine modèrn i guéri an dë tan troi mouvman é la médssine tradisyonèl la pa gagné pétète pars èl lé pa assé konï pétète pars èl la pankor assé avanssé – mé pti pa, pti pa n’arivé.

Souvan dé foi galman mi kalkil la médssine modèrn é mi antann toute bann krétik in bonpé d’moune i fé par rapor médssine-la. Kan mi antan demoune, défoi bann savan, kan zot i roprosh la médssine modèrn son vantardiz, son mépri par rapor bann médssine tradissyonèl, son dépandanss par rapor lo mond larzan, mi di an mwin mèm néna dé shoz pou shanjé, pou réformé, in sorte modésti pou rotrouv konm valèr- in tienbo konte lo savoir noute bann zanssien pou romète anlèr.

Dë mo pou anparl noute kréolizassion, valab pou nou konm pou in bonpé péi konm nou, mi oi sa konm in bon fassonn d’ fèr, fassonn kalkilé, fasson pou antroprann pou ronouvèl in pé la médssine épi la santé pou ariv a songn toute bann tablatir i tonb dsi lo mond koméla-é ankor nou la pankor vi toute- inn fasson pou alé dopi in il pou alé dann lo mond konm Paul Vergès téi di dann inn son bann liv.

A bon antandèr salu !