Souvan dé foi, mi fé in rèv : oir bannzil loséan indien bien dakor inn sanm l’ot !
Justin, out tèt la pa bon ! Akoz, in rèv, sa in réalité ! Nout tout i èm pa konm shoushout èk la mori ? La poin la guèr rantré nou ! Nou rann vizite lé inn, lé-l’ot ! Ni frékant, ni fé léspor ! Kan siklone i soukous madagascar, bann Rénioné lé solidèr ! Lé vré, la pa vré ?

Bien sir, mé lé ga ! Sa i sifi pou lantant,pou lamitié sa ? konbienn foi, nou la vi marké dsi bann mir, malgash déor, komor déor.. Konbienn foi,dann radio, ni antann trète nout bann voizin (konm mi di : nout bann famy !) moins bien ki trète zanimo !
Kroi pa demoun lé z’ot bann zil loséan indien i port anou dann zot kèr. Si tèlman mové zafèr la drèss anou inn kont l’ot, napoin sitèlmann tan ksa ankor !

Poitan, si ni vé mète anlèr nout kodévlopman, si ni vé nout kiltir i armaye inn avèk l’ot, si, solon nou, toulmoun lé bien èz viv in pé bien dann nout bannzil, i fo kass la kok lindiférans, lo mépri, la méshansté i anklav nout kèr lé z’in pou lé z’ot.
Alor, mi di : « Akoz pa roganiz, dann tout zil loséan indien, in gran fète lamitié, lantant, la solidarité ? ».

Justin