Zordi i tonm lo 17 moi d’ désanm. Astèr nou lé apré marsh déssi vin désanm. La fète kaf konm déssèrtin i di... l a fète la liberté, sansa ankor la fète rényonèz la liberté. Moin pèrsonèl, shak foi vin désanm i ariv, moin l’apré domandé, dann mon kèr, koman i fo fé sélébrasyon-la. Mi di pa fète, pars mo-la i sonn in pé kourt dann mon tète.

Konmsa nou té i konpran la vi !
Dann la rolizyon katolik nana la fète Pak. Sa lé bien vré ! Mé avan sa, nana vantrodi sin.Vantrodi sin, kan nou lété pti, la famiy té i anpèsh anou shanté zour-la. Mèm siflé té défandi. Té défandi ossi, koz for, fé dézord an pansan dann kèl tourman lo Krist té apré passé. Troizèr, momon téi fé anbras lo pyé lo Krist, aprésa nout kèr té klèr. Dimansh i sava la mèss. Mèm parfoi lo prètr té i done tout marmay in pti gato épi i sava la kaz kontan. Momon téi fé lo méyèr ropa possib. Konmsa nou té i konpran la vi !

Avan lo vin, nana lo diznèf
Astèr alon arkoz déssi vin désanm mil ui san karant uit. Avan lo vin, nana lo diznèf. Lo diznèf bann zésklav té pankor libéré, lo vin oui. Donk mi pans, la nuite lo diznèf zot la pass sa anparmi zot bann dalon é lo vin, déssi la plas Gouvèrnman avèk toute sak té ankor zésklav la vèy-o-soir. Sak téi rèss dann kartyé, mi sipoz, la vni dovan la méri. Zot la mète shapo déssi zot tète, pars avan l’avé poin lo droi, é sak téi gingn in linz nèv avèk la koulèr dodan, pa la grizaye, pa la bleuzaye, zot l’avé soman lo droi oparavan.

In bon manyèr d’ sélébrasyon
L’èr-la, solon moin, ala in bon manyèr pass dé zour-la. Lo soir, i di la priyèr... toute kalité priyèr, dann toute rolizyon. I pé ossi, lir in gran modékri, sak bann z’ansien la lèss pou nou, épi ossi sak bann konpatriyot i pé gingn fé. I pé ossi shante maloya avèk romans an tristèss pou majine nout bann zansète kan lété plonjé dann fénoir malizé. I pé ossi, fé in kabar, in vré kabar pa i léspéktak. Donk lo diznèf-o-soir in gran véyé, épi landomin la fète, la fète... a tou-kassé ! Noré d’gou solman !

Justin