Bann guèr i tié tan é tan dmoun la pa fé arien pèrsonn : malérèzman, la pankor fini, épi la pa pré d’finir. Tout mor lé initil, sa lé bien vré galman. Sérié ! Mi pans nana in zour i fo sak lé vivan i pans bann viktime la bétiz, épi la méshansté dmoun... Prézidan la répiblik i sort di, bann marmay kour moiyin dézyèm ané - shak marmay - va aprann lo nom in zanfan juif assassiné épi va mazine ali.

Konm lo prézidan lé dann bon shomin, mi propoz ali in n’ot afèr an pliss : nana in bon pé zanfan lé mor kan bann kwasa-kwasa la koulé, é la pa fini. Si na moiyin artrouv z’ot nom, mi èmré i domann bann marmay kansréti sète Mayotte, la Rénion, mèm la Frans, apèl banna par z’ot nom, épi di pou vréman pou kossa zot lé mor.

Apré, sar pa fini : nana malgash lé mor lané 1948, nana bann z’alzérien, bann viétnamien épi d’ot ankor. In mor inossan, sé in mor inossan, i fo anparl dé li. Épi bann viktime lo rasism, nana partou dann listoir la Frans. Alor, akoz pa in moniman, sansa in plak, épi in zour pou anparlé avèk bann z’amontrèr pou és-pliké ?

Justin