Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mé kosa i kroi don ? I éspèr lo tan lontan i sar rovni ou kosa ? Pars figir aou mon nové, mi suiv bien la politik La Rényon. Moin la fine suiv lé z’ot kandida, sak i vé fé dé shoz san mète La Rényon san dési, san désou. Ala ké zot i ariv, zot bann rouj-de-fon épi lo mouvman Lo Progré é zot i mète a anparl la ruptur, zot i anparl l’idantité rényonèz, zot i rapèl anou pli k’i fodré ké nou lé isi dann l’oséan indien é pa dann l’Erop la-ba. Zot i pans sa va ranpli nout marmit de ri sa ? Zot i pans lo moun lé paré pou la ruptur ? Alé dormi don ! Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, ou sar pa étoné si mi di aou, ankor inn foi, moin lé pa ditou dakor avèk ou. Pou kosa ? Pars si ni oi bien, konnm toulmoun i oi, ni fons droit dann mir, i fo kontinyé fonsé ziskatan k’i fé pète nout tèt. Lé pa rézonab dir in n’afèr konmsa ! Si ni oi bien nana in bann gro niyaz noir l’apré ramas dann nout syèl, ni doi fé konmsi de riyin ditou ? Nou sré fou si ni fé konmsa ! Si ni oi lo mond antyé lé mal baré avèk lo réshofman klimatik i fodré pa ni bouj ? Pars tout lo bann tablatir lé riskab arivé va évite anou, anou tou sèl dann l’oséan indien. Kroir sa, sé an avoir pèrd la tète ! Si tout lé z’ot i kashyète déyèr z’ot ti doi, nou osi ni doi fé parèy ? Arète in kou matant, vi voi bien sa lé pa posib.. Si vi fé travay in pé vot tèt, si vi fé bouy in pé out matyèr griz, ou va konprann sé nou na rézon. Sé nou na rézon pars ni vé marsh dann la diréksyon in Rényon nouvèl. In Rényon nouvèl ? Akoz pa ! tok ! Pran sa pou ou.